იუსტიციის სასწავლო ცენტრი

Gürcüstanın Ədliyyə Təlim Mərkəzi sizə gürcü dilini pulsuz, asanlıqla, sizə uyğunlaşdırılmış sürətlə, istənilən yerdən öyrənmək imkanı verir.

Mərkəz tərəfindən yaradılan kursun əsas məqsədi gündəlik rəsmi və qeyri-rəsmi ünsiyyət üçün zəruri olan ifadələri öyrətməklə, gürcü dilində danışıq bacarığını inkişaf etdirməkdir.

Kurs 20 dərsdən ibarətdir, bunlardan üçü gürcü dili əlifbasının öyrədilməsinə, qalan on yeddi dərs isə baza səviyyəsində öyrəniləcək gürcü dilinin lüğət və qrammatikasına aiddir.

Hər bir dərs gündəlik vəziyyətləri əks etdirən dialoqla başlayır, məsələn: Supermarketdə, Oteldə, Bankda və ya Ədliyyə Evində xidmət almaq, Həkim məsləhəti, Dostla hal-əhvallaşmaq, Hobbi haqqında söhbət, Səyahəti planlaşdırmaq və s.

Gündəlik vəziyyətlərdə lazım olan ünsiyyət ifadələrini öyrətməklə yanaşı, hər bir dərsə dil vahidlərinin akademik tədrisi, xüsusilə də  qrammatika və leksika üzrə çalışmalar daxildir və bunlar da  çətinliyi artırmaqla bölüşdürülüblər.

Təqdim olunan məlumatların qavranılmasını və başa düşülməsini asanlaşdırmaq üçün hər bir dərs əyani materiallarla, o cümlədən fotoşəkillər, animasiyalar, video və audio materiallarla tamamlanır.

Hər dərsin sonunda kursun istifadəçisi əldə etdiyi biliyi yoxlamaq üçün özünüqiymətləndirmə testini yerinə yetirir və bunun uğurla başa çatdırılması növbəti dərsə keçmək üçün ilkin şərti təqdim edir.

Kursu bitirdikdən sonra istifadəçi sertifikat alır.

Kurs BMT-nin İnkişaf Proqramı və Almaniya Hökumətinin dəstəyi ilə “Qanunun aliliyinin təkmilləşdirilməsi və hamı üçün ədalət mühakiməsinə çıxış imkanlarının artırılması” layihəsi çərçivəsində yaradılıb.

Kursun məzmunu üzrə tam məsuliyyəti Gürcüstan Ədliyyə Təlim Mərkəzi daşıyır və BMT-nin İnkişaf Proqramının və ya Almaniya hökumətinin fikirlərini əks etdirməyə bilər.